Ē khì hō͘ lâng sái-lāng, sī chi̍t chióng “si̍p-koàn”. 會去予人使弄，是一種“習慣”

Kin-á-ji̍t chóng-sǹg ū ki-hōe kā tông-sū kóng mài siuⁿ siong-sìn hit-ê tiāⁿ lâi loān kóng ê lâng kóng ê ōe.

Chú-iàu sī ū chi̍t ê cháu khì sî-chit ah, chhut lâi tō leh kóng thâu-ke lóng bô iōng ka-sin lâi kā lâu. In tō leh khau kóng siáⁿ tī thâu-ke bīn-thâu-cheng hia âng lóng mā bē hoân-ló sin-súi, chhín-chhái sai-nai chi̍t--ê tō ka sin. 

Góa tō kóng, lín chin-chiàⁿ mài siuⁿ thiaⁿ hit-ê siáⁿ kā lín kóng hia-ê ōe. Hit-ê lâng kap kî-tha ê lâng lóng bô siáⁿ kau-chhap, i ē chai siáⁿ？ In kóng i kóng ū khóaⁿ tio̍h kong-si ê sin-súi chu-liāu. Góa kóng hit-ê lâng ka-ki siong pan siáⁿ chêng hêng, ná ū siáⁿ chu-keh kóng pat-lâng. In sóa kóng, "Oa！ sī leh hō͘ siong phoe tàu oh." 

Góa kóng m̄-sī ah, lí siūⁿ mah, i sī siáⁿ lâng, sī siáⁿ chit-bū, ná ē-tàng khòaⁿ tio̍h sin-súi ê chu-liāu？ i sī sàng hòe, koán chhng-khò͘ ê lâng, ná ē khì khòaⁿ hia ê mih-kiāⁿ？ Koh ū i kóng kî-tha ê lâng ka-pan lóng bô leh chò tài-chì, iah i kám ū kap lâng ka-pan kòe？ I kóng siáⁿ lâng khó koan-hē tō ka sin-súi, i lóng bô siuⁿ kóng lâng sī lóng chin chá tō siōng-pan, hāu-lu̍t mā chin koân, lóng bô siūⁿ kóng i ka-kī, thâu-ke thong-iông hō͘ i kiam-chit khì sái chhia（ū thiaⁿ kóng i tâu-chu sún-si̍t chiok chē）, i sim-chêng bô hó tō ài lâi m̄ lâi, iā bô kài liáu kái tāi-ke khang-khòe bô kâng sì-kè loān kóng（i sī chhng-khò͘ pō͘, kî-tha ê lâng lóng sī pian-chip pō͘！）. Che sī húi-pòng neh. 

Lēng-gōa chi̍t-ê mā ū siūⁿ beh sî ê chit sî chiah kóng, “Bô chhò！ i ê ōe m̄-thang siuⁿ sìn” In chiah bô koh thè i kóng ōe.

Chit kiāⁿ tài-chì hō͘ góa hoat kiàn kóng ē khì thiaⁿ lâng sái-lāng sī-hui koh ē siong-sìn, thè tùi-hong kóng ōe ê lâng, chit pái kā thê chhíⁿ, in ē pái m̄ chai tī tó mā sī ē koh khì thiaⁿ sìn. Ē khì hō͘ lâng sái-lāng, khan leh gōng gōng sē sī chi̍t chióng “si̍p-koàn”, chi̍t khoán thâu-náu bô leh su-khó ê hiān-siōng hoán-èng, chheh tha̍k gōa koân lóng bô kái.（Goán hit kúi ê tông-sū lóng bat tī gōa-kok tha̍k kòe chheh, mā jīn-ûi ka-kī sī chiok chìn-pō͘ ê chheng-liân）

今á日總算有機會共同事講莫siuⁿ相信彼个siuⁿ來亂講ê人講ê話。

主要是有一个走去辭職矣，出來就leh講頭家攏無用加薪來共留。In就leh哭講誰tī頭家面頭前hia紅攏嘛袂煩惱薪水，瀙彩sai-nai一--ê就加薪。

我就說，lín真正莫siuⁿ聽彼ê誰共lín講hia-ê話。彼个人佮其他ê人攏無啥交喢，伊會知啥？In講伊講有看著公司ê薪水資料。我講hit-ê人家己上班啥情形，哪有啥資格講別人？ In煞講 “哇！是leh互相批鬥喔？"

我講m̄是，你想嘛，伊是啥人，是啥職務，哪會當看tio̍h薪水資料？伊是送貨管倉庫ê人，哪會去看hia ê物件？擱有伊講其他人加班攏無leh做代誌，iah伊敢有佮人加班過？伊講啥人靠關係就加薪水，伊攏無想kóng人是攏真早就上班，效率嘛真高，攏無想伊家己，頭家通融予伊兼職去駛車（有聽講伊投資損失足濟），伊心情無好就愛來m̄ 來，也無介了解大家工課無仝四界亂講（伊是倉庫部，ê人攏是編輯部！）. 這是誹謗neh. 

另外一个嘛想欲辭ê這時才講，“無錯！伊ê話毋通相信” In才無koh替伊講話。

這件代誌予我發見kóng會去過攘使弄是非koh會相信，替對方講話ê人，這擺共提醒，in下擺m̄知佇to位嘛是會koh去聽信。會去予人使弄，牽leh戇戇旋是一種“習慣”，一款頭腦無leh思考ê現象反映，冊讀偌懸攏無解。（阮彼幾ê同事攏bat佇外國讀過冊，嘛認為家己是足進步ê青年）