Thiaⁿ 謝銘祐ê 過阮的港

Kin-á-ji̍t thâu pái thiaⁿ tio̍h chit tiâu koa, chiok kám tōng.

Góa ē siūⁿ tio̍h ū chi̍t-pái thiaⁿ goán má kóng, i hām goán pa tú kàu Ke-lâng ê sî, tòa tī Ke-lâng Lâm-êng lō͘ hia（ka Kòe-káng chha bô kái hn̄g） khui siu-lí khì-chhia ê kang-tiûⁿ. Ū chi̍t nî tú tio̍h hong-thai, pang soaⁿ, kā kui ê siu-lí chhiúⁿ lóng khàm tiāu khì. Khiā-ke mā chha put to lóng bē tòa nih...kui nî phah piàⁿ ê mih-kiāⁿ lóng o͘-iú khí.  Hit sî góa iah bē chhut-sì, m̄ koh góa téng thâu ū 3 ê hiaⁿ chí. Āu-lâi goán sī it-tit leh poaⁿ chhù, kàu góa tha̍k ko-tiong it nî goán chiah ū ka-kī ê chhù thang tòa. 

Ka-kī chhut lâi chia̍h thâu-lō͘, koh thiaⁿ pē-bú siàu-liân sî phah-piàⁿ chia̍h khó͘ chhī ke ê tāi-chì, chiah ē chai i̍t-chhè lóng ài kám-un, kám siā só͘ ū jīn-chin phah-piàⁿ ūi tio̍h sì-sè ê lâng. Iû-kî hit sî ê Tâi-oân tiâu kiāⁿ iah koh chiok bái, in keng kòe chiàn-cheng, liân chheh tō bô tàng tha̍k hó, koh ài ōaⁿ o̍h pa̍t khòaⁿ gí-giân. Thiau-chiàn chin chē. Ná chhin chhiūⁿ chit tiâu koa lâi siá ê,  khì o̍h sai-á, phāiⁿ thô͘-thòaⁿ...kan-khó͘ sàn-chhiah mā sī ài kòe káng.