Kin-á-ji̍t ê kám-sióng

Chá-khí tī chhia téng khòaⁿ tio̍h lâng thê e-reader leh khòaⁿ, góa tō siūⁿ ：che kám ē mā sǹg sī chi̍t chióng ê chù-ì-le̍k bô pān-hoat chi̍p-tiong ê būn tê？Tá chhia ê sî, té-té kúi hun-cheng mā tō ài thê mih-kiāⁿ lâi tha̍k, khòaⁿ--lâi ká-ná sī leh lī-iōng sî-kan, m̄-koh sī m̄ sī kî-si̍t sī bô pān-hoat chhú-lí che kúi hun-cheng m̄-chai beh chhòng-siáⁿ ê sî-kan？（ps. góa khah hán leh khòaⁿ lâng kín-kiâⁿ kín-tha̍k chóa-pún ê chheh, sóa khah chiap khòaⁿ tio̍h chhia chām lāi ū lâng ná-kiâⁿ ná leh tha̍k e-reader, sī m̄ sī tiān-chú ê mih-kiāⁿ khah ē hō͘ lâng piàn chò ài tha̍k chheh neh？ ）

Góa siūⁿ khí tú khai-sí liān cháu ê sî, góa it-téng lóng ài thiaⁿ im-ga̍k chiah cháu ē loeh khì. Āu-lâi leh chù-ì kî-thaⁿ khah lī-hāi ê pháu-chiá, hoat-kiàn in chin hán leh thiaⁿ im-ga̍k. Āu--lâi góa chiām-chiām o̍h khòng-chè chhoán-khùi ê hong-sek kap tempo, bān-bān tō hoat-hiān kî-si̍t lí nā choan-sim tī “cháu” chi̍t kiān tāi-chì, ū chin-chē mê-kak ài khì chù-ì：chù-ì chu-sè, kha-pō͘, chhoán-khùi ê tempo, chù-ì hù-kīn ê chōng-hóng, im-ga̍k tō bô siáⁿ su-iàu lo.

Í-siōng chit ê lē ká-ná khah hn̄g, m̄-koh góa ê ì-sù sī, chit-má chin chē lâng nā ū kúi hun-cheng tō sī ài khòaⁿ tiān-chú sán-phín, m̄-koán sī leh sńg game, liû-lám bāng-lō͘, iah sī tha̍k tiān-chú-chheh, khòaⁿ--khí-lâi ná chhiūⁿ chin pá-ak sî-kan, m̄-koh sóa mā chin pháiⁿ lāu-sîn-chāi-chāi lâi bīn-tùi chi̍t-tōaⁿ siáⁿ-mih lóng bô chò ê sî-kan, iah-sī choan-sim tī chi̍t-kiāⁿ tāi-chì téng-thâu, keng ka sī tùi sin-piⁿ ê chōng-hóng lú bô leh chù-ì.

M̄-koh che sī góa kò-jîn ê siūⁿ-hoat, mā bô tiāⁿ lâng sī chin chiàⁿ leh lī-iōng khiā leh chia̍t-ūn chhia té ê kúi hun cheng, tha̍k i phó͘-thong sî bô sî-kan tha̍k ê sió-soat. sē i bô sî-kan sē ê bāng-lō͘ siong-tiàm. Tō kan-ta góa sī leh lōng-hùi sî-kan koh m̄ chai.